IES de Brión (Brión, A Coruña)

Hoxe estamos de celebración e isto tiña que ser noticia no noso blog. Non todos os días temos a oportunidade de contactar con científicos, ou, como neste caso, científicas, en riguroso directo, dende o lugar onde desenvolven o seu labor investigador…E moito menos se ese lugar é a Antártida!

Adoración Sánchez Mata, Bióloga e investigadora do CIMA (Centro de investigacións mariñas) recibiunos, virtualmente falando, dende a Base Gabriel de Castilla na Antártida. Ao longo do tempo que durou a videoconferencia, falounos  do seu propio traballo sobre as comunidades de organismos da zona intermareal,  pero tamén dos outros proxectos de investigación que se están levando a cabo, algúns sobre o vulcanismo Antártico; como tivemos ocasión de comprobar por boca dunha das Xeólogas que investigan tamén alí.

Tamén nos falou, Adoración, das particularidades que ten a investigación nese lugar privilexiado, algo que valora tan positivamente que, esquecendo as incomodidades climáticas, entre outras (que seguro que as hai)…Case non é capaz de sinalar nada negativo!

Non sei a vós, pero a min resultoume emocionante esa comunicación directa  con persoas tan entusiastas, dende un dos lugares máis emblemáticos onde se está facendo ciencia contemporánea. Invítovos a que fagades os vosos comentarios, reflexións, preguntas (especialmente aqueles que non as puidestes facer por falta de tempo)…Porque ao mellor hai sorpresas!

Déixovos aquí unha ligazón onde podedes ver fotos e información sobre a campaña Antártica 2010-2011:

http://www.ejercito.mde.es/unidades/Antartica/antartica/proyectos_10-11/index.html_1910061517.html

Benvida á promoción do curso 2010-2011!

Este curso, como no anterior, desde as Ciencias para o mundo contemporáneo intentaremos seguir a pista da Ciencia que se está a facer agora mesmo, da que acaba de saír do forno. Farémonos preguntas arredor dela e intentaremos buscar respostas aguzando os sentidos. Intentaremos informarnos para distinguir entre a Ciencia e a Pseudociencia, entre o feito científico demostrado e a simple especulación, entre Ciencia e Ideoloxía…Veredes que, ás veces é unha tarefa difícil, pero non hai nada que se resista cando hai interese, curiosidade e tenacidade. O premio a este esforzo será o de facernos máis ricos (en saberes), menos manipulables, máis libres!

Un ano máis poñemos en marcha o blog, dentro desta materia, que nos permitirá intercambiar ideas, información, debater arredor da Ciencia e da Tecnoloxía.  O que pretendemos é aprender e pasalo ben aprendendo: que mellor, que facelo de xeito compartido! Como o faremos no blog.